دي أول مشاركة ليا في المدونة.
أنا إسمي أحمد سعد, مهندس معماري, من مصر, وأنا بأكتب البوست ده عندي 24 سنة, 3 شهور, و12 يوم :)
المدونة دي أنا خصصتها علشان أعرض فيها دروس خاصة ببرنامج الريفيت باللغة العربية (اللهجة المصرية).
ليه Revit؟
برنامج الريفيت, من بعد ما إتخرجت من الكلية في سنة 2012, بدأ يلفت إنتباه الناس كلها في مجال البناء. وخصوصاً في مصر والدول العربية, ده بسبب مميزات كتير أوي .. مش في حِلّ إني أتكلم عنها دلوقتي. لكن يكفي إنه كتير من الشركات في مصر وفي الشرق الأوسط بدأت إنها تتحول لإستخدام الريفيت في إخراج رسوماتها المعمارية.
ليه دروس في الريفيت بالعربي؟
دلوقتي, وبعد سنتين -تقريباَ- من تخرّجي من الجامعة, مستوايا في الريفيت تتطور بشكل كبير جداً ده لإني من بعد ما إتخرجت وإشتغلت في شركة "
أولسون لافواه - مصر" لقيت إنه كل الشغل بيعتمد إعتماد شبه كامل على برنامج الريفيت. فكان حتماً ولا بد إني أتعلمه, وفعلاً بدأت أشتغل بيه, وبدأ مستوايا يتطور مع الوقت.... لكن المشكلة كانت في إن التطور ده بطيئ لحد ما, ف كان إيه الحل؟!
الحل كان في إني شوفت الفيديو ده ...
فيديو شيّق جداً, مدته تقريباً تلت ساعة.
ملخص الفيديو في إنه Josh Kaufman بيشرح تجربته في إنه إزاي تقدر تتعلم أي حاجة, في خلال عشرين ساعة!! .. آه, عشرين ساعة.
شوفوا الفيديو وإستفادوا منه ...
المهم, أنا إستفدت من الفيديو في إني بدأت أطبق كلامه, بدأت أعمل search موسّع عن كل اللي موجود على النت من فيديوهات تعليمية لبرنامج الريفيت. آه .. كل اللي موجود على النت, كل الكورسات, كل الكتب, كل الفيديوهات اللي بيعملوها أشخاص محترفين وغير محترفين. بدأت أجمع كل ده في Bookmarks عندي, وبدأت أتفرج عليه وأطبق عملي.
قابلتني مشكلتين مهمين جداً في خلال الفترة دي:
- المشكلة الأولى كانت اللغة. أنا كان مستوايا في الـ English متواضع جداً, زي أي حد خريج مدارس حكومية. ويمكن أسوأ.
ف كان برضو حتماً ولابد إني أركّز أكتر على نقطة اللغة, كان لازم أتعامل مع المشكلة بحيث إنها ما تأثرش بشكل عكسي عن اللي عايز أوصله, ف بدأت ألاقي حلول مؤقتة علشان تخرجني من المأزق. ممكن بعدين لو سنُحت لي الفرصة إني أتكلم أكتر عن حلولي للمشكلة دي.
- المشكلة التانية هيا .. إنه كان المحتوى العربي لدروس تعليم الريفيت على الإنترنت قليلة جداً جداً .واللي موجود منه إما قديم, أو مش إحترافي بالدرجة المطلوبة. حتى مراكز تعليم الريفيت, بيستغلوا المستخدمين إستغلال كبير. بالإضافة إني أصلاً مؤمن بشدة إنه الـ Self Learning هو أفضل طرق ووسائل التعلم, قاطبة.
ف كان لازم إني أتعامل على إن مشكلتي الأولى بقت أمر واقع بالنسبة لي.
المدونة دي, هي مشاركة مني.. في تقليص حجم تأثير المشكلة على ناس كتير شايف إنهم بيتعبوا وبيعانوا علشان يتعلموا الريفيت بالعربي, وده بسبب المستوى التعليمي في بلدنا اللي أدى لخروج أجيال بتعاني من مشاكل كتير جداً, من ضمنها الحصول على المعلومة.
برضو ليه بالعربي؟ ... بالعربي لإنه كنت بأوصل لدرجة من الإحباط وأنا في بدايات تعلّمي للريفيت بإنه ليه أمة تعدادها أكتر من 348,755,830 مليون شخص ومتلاقيش أي مصادر كافية إنك تتعلم وتطور من نفسك بسهولة كما ينبغي, وزي ما هو العادي أصلا في دول كتير مش عربية, ومش مسلمة كمان!!
من ناحية تانية, أنا شايف بإنه بالمشاركة, وبالمشاركة بس .. ممكن "ننهض" كبني آدمين. بغض النظر عن ملامحنا, أدياننا, أشكالنا, أصولنا .. .بغض النظر عن أي حاجة ..
_________________________________________________________________________________
ليه Gollum؟ :)
- أنا سمّيت المدوّنة بإسم "Revit Gollum" .. تيمّناً بالشخصية الجبارة دي :)
شخصية Gollum . من مجموعة روايات وأفلام The Hobbits.
- سبب التسمية هو إني بأشوف نفسي كتير من الأوقات في الشخصية دي بتصرفاتها بشخصيتها المترددة .. بإنه ممكن يقول رأي وينتقد نفسه في نفس اللحظة. بغض النظر عن إن الشخصية حلوة أو لأ, بس أنا بأشوف نفسي في كتير من تصرفاته.
- إيه علاقة الكلام ده بمدونة عن الريفيت؟ ... الإجابة في الفيديو ده ...
- Gollum .. كان بالنسبالي نسخة طبق الأصل مني لما كنت في صراع داخلي بين إني لازم أحسّن من قدراتي في حاجات كتير, من ضمنها الريفيت, وبين إني في نفس الوقت أحسّن من نفسي على المستوى الشخصي وآدائي في شغلي وإلتزامي بالمواعيد (اللي كنت نادراً لما بأروح بدري على أي حال :) ) ... فـ تعبت كتير بين حياتي الشخصية خصوصاً إني عايش لوحدي, وبين إحتياجي لإني لازم أطوّر من نفسي ....
- المدونة دي بتمثل Gollum اللي كان بيصارع علشان يتعلم الريفيت :)
أتمنى إني أقدر أشارك بجزء بسيط في تشجيع, أو إفادة أي حد حابب يتعلم الريفيت.